Eckernföör: Umweltfründliche Gemeen in de Johren 1988, 1992, 1996 un 2000

De Anfung

Mit dat Umweltkataster 1984/85 fung in Eckernföör de ökologische Nietiet an. Dat, wat landschopsökologisch wichtig weer, is dorin fastholen worrn, verbunnen mit Raatslääg för enkelte Maatnahmen för de tokamen Stadtentwickeln. De Flächennutzungsplaan vun 1982 is vergleken worrn mit dat, wat bi’t Vermeten (Kartieren) faststellt worrn is, 24 Strietfälle hett dat geven. För jeden enkelten Fall sünd Bestand, Planen, Problemen un woans en de lösen kann, opföhrt worrn. Dorbi is düütlich worrn, dat’n de Stadt nich wieder na Noorden utdehnen dörft, denn en Överbuen würr de Landschop mit de velen weertvullen Biotopen nich verknusen könen. Ok weer de Inwahnertall vun Eckernföör as Middelzentrum stüttig anwussen, sodat bavento nie Rebeten för den Wahnungsbu un Bedrieven nödig bruukt würrn. In dat Umweltkataster is de Politikers de Raat mitgeven worrn, de Stadtentwickeln na Süden hen vörantodrieven, wo dat siet Gootstieden wiede un biotoparme Ackerflagen gifft. So kunnen dörch en umweltschonen Bebuen nie Gröönrebeten schafft un dormit en Bidrag för dat Opweerten vun de Landschopsökologie leist warrn. De Folg hiervun weer, dat de domolige Börgermeister vun sien Verwalten en „Beslussfohrplaan“ erstellen leet, de denn in de Johren 1985-87 Padd för Padd afarbeit worrn is. Af den 1. Januar 1988 kunnen wichtige Flagen för de nie Stadtentwickeln de Gemeenflagen toföhrt un gliektiedig mit dat Opstellen vun en Landschopsplaan op de Grundlaag vun dat Umweltkataster anfungen warrn. De Mitarbeiter, de sik mit disse Fragen befaten müss, hett denn dat Leit vun de nie gründt Afdelen „Naturschutz und Landschaftsplanung“ kregen.

Entwickeln

Nu kunn he sien Vörstellen (Visionen) vun de ökologische Stadtentwickeln mit de Hölp vun en Buleitplaan umsetten. 1992 un 1993 sünd Landschops- un Flächennutzungsplaan, de de glieken Telen (Ziele) hebbt, beslaten worrn. Nu weer’t sowiet mit de Planen för de eersten Warf- un Burebeten in den Südwesten vun de Stadt. Hierbi is vörgahn worrn as vörher ok: Ut en kumplette Bestandsopnahm wurr en vörlöpige Gröönornensplaan entwickelt, in de de Buflagen un dat Gröönkunzept fastleggt wurrn. Dat weer nu de Vörgaav för den Bebuungsplaan. So kunnen later keen Probleme för dat Fastleggen vun sinnvulle Utglieksflagen opdükern, de’t annerwegens al geven würr. Wichtig weer ok, dat Naturschutzverbännen un Fachlüüd fröhtiedig mit inbunnen worrn sünd. Bispills för disse mustergültige Planenskultur findt wi in dat Burebeet „Domsland“ un in dat Warfrebeet „Marienthal“.

Verkehrskunzept

Allens,wat mit de Telen vun de Landschopsplanen nich övereenstimmt, muttt de Afdelen "Naturschutz und Landschaftsplanung" vörleggt un, wenn’n nödig is, vun dor ännert warrn. Mehrstendeels warrt Umweltfragen al fröh in anner Afdelen vun sülvst mit inplaant. So is dat Verkehrskunzept vun de Stadt so entwickelt worrn, dat dat Radweegnett veel länger is as dat Stratennett un dat Fohrrad över wiede Stecken dat gauste Verkehrsmiddel.

Renatureren (Trüchwanneln)

Al to de Tiet, as dat den Landschopsplaan un den ännerten Flächennutzungsplaan noch nich geev, dat weer 1986, geev de Stadt grönet Licht för‘n Barg Maatnahmen för dat Renatureren un för dat Gestalten vun Biotopen. Dorbi goll de Grundsatz, dat sik de Natur op’t leevst sülvst överlaten blieven schull, Ingriffe un Opwand so minn as nödig. Kuntrullen, vun Tiet to Tiet, weern dörch de Stadtentwickeln en grote Hölp. En Bispill hierför is de "Lachsenbach" in den noorden Stadtdeel Borby. Disse Beek un Gröönkiel is nich blots vör Överbuen bewohrt worrn, he hett för de Minschen ok en groten Erholungsweert. Dor is enwötert un nie anplant worrn, tosamen mit Wannerweeg för de, de sik hier, wiet af vun Alldagslarm, en beten verpuusten wüllt. De beiden Burebeten in dissen Stadtdeel sünd so anleggt worrn, dat se dat Lachsenbeeksystem nich stören doot. Wat jümmers mehr Naturfrünnen antrecken deit, dat is de "Eimersee" (Ammer- Emmersee), dörch de de Lachsenbeek flütt. Wo kummt nu disse Naam her? 1990/91 is de Beek mit en eenfachen, slichten Mörtelammer verslaten worrn, so dat en 1,5 ha grote Lunk (Senke) mit Water opfüllt warrn kunn. Blangenbi sünd 3 ha Wischen foorts mit versorgt worrn. De Bövere Ammersee is as en Biotopanlaag, de nich veel kost hett, wiet över Eckernföör rut bekannt worrn. Ok in de annern Stadtrebeten sünd Fuuchtflagen wedder herstellt un vele Kilometers Knicks nie anleggt worrn. Dat is in Tosamenarbeit mit dat "Berufsfortbildungswerk" "Pädal"“ un de Krinks vun de örtlichen Naturschutsverbännen op den Weg bröcht worrn. Hier mutt’n sünnerlich den Naturschutzbund nömen, de ü. a. de Goosseewischen mit groten Insatz un Hengaav oppassen deit. In dat Renaturerenskunzept vun de Stadt Eckernföör höört ok de Rüch- un Umbu vun Warfbuten, de nich mehr nütt warrt, to’n Bispill Bunkers un Soltlagerhallen för Fladdermüüs un dat Gelände vun en ehemolige Iesenworenhandeln as Naturspeelplatz mit Heckenlabyrinth, Klatterlandschop un Waterspeelanlaag.

Buen

Bi all Buvörhebben is dorop acht worrn,dat de Niebuten in de Landschop inpasst warrn müssen (twee Supermärkte in den noord-westlichen Stadtrand mit Tanksteed). För Carports un anner ünnerornte Gebüdedele gellt, dat se gröne Dacken hebben mööt. En Grundsatz, de nöömt de Politikers Nahholtikeit, (Nachhaltigkeit), mutt bi all dit Doon in’t Oog beholen warrn. So warrt Knickholt häckselt un as Biomasse vör dat Winnen vun Warms för 450 Wahneenheiten verfüert, Solaranlagen, Knickheiz- un Kompostierungsanlagen föddert, de Gröönsnitt un Seegras vun den Kurstrand „verfodert“ un op jedeen Insatz vun Gift-Herbizide un Pestizide verzicht. Ok bi dat Grünnerzentrum in’t Warfrebeet Marienthal (TÖZ) hebbt de Makers all disse ökologischen Oplagen mit bedenken müsst. Ünner dat Motto "Arbeiten, Wohnen und Forschen" sünd hier un in’t Wahnrebeet Domsland, dat neeg bi liggt, Projekten för de EXPO 2000 op de Benen stellt worrn – in’n Inklang mit de Natur.

Stellenweert (Bedüden)

De Stadt sett sik, so hebbt wi nu verstahn könen, dorför in, dat de Börgers en Sinn för Ökologie entwickeln doot. Dorbi schüllt dat UIZ (Umwelt Info Zentrum) un dat OIC (Ostsee Info Zentrum) mithölpen. Se is ok Maat in den „Verein zur Förderung der Umweltbildung in Eckernförde“. In de velen Johren, in de in Eckernföör ökologisch plaant un hannelt worrn is, hett dat för de Stadt en Barg Loff un Anerkennen geven, veermol den Titel "Umweltfreundliche Gemeinde" un "Bundeshauptstadt för Natur- und Umweltschutz 1994/95".

Umweltbewusst un liekers nich weertschopsfiendlich, gliektiedig Urlaubsoort mit groten Wahn- un Frietiedsweert – so präsenteert Eckernföör sik vundag. Dat süht so ut, as harrn de Japaners un Amerikaners Eckernföör entdeckt, denn in fief japansche Städer un in Boston (USA) sünd al Vördräge över de Biotopen vun Eckernföör holen worrn. So schall’t wiedergahn, is över Parteigrenzen henweg beslaten worrn.