auf Hochdeutsch

Dat kulturelle Leven in Eckernföör

In Eckernföör kriggt en nich bloots Fisch satt, nä, nä, dor wohr di weg, ok Kultur, un dat 365 Daag lang, opto allens vun hoge Qualität. Dor sorgt Hümpels vun Verenen, Institutschonen un Künstlers för, de stüttig en groten Rükelbusch vun Anbotten anbeden doot, ü. a. Musik- un Theoterverantalten, hooch- un plattdüütsche Leseavende / namiddage, Künstlerwarksteden un Wiederbilden (Volkshoochschool). Schall mol ener seggt hebben, Eckernföör weer de heemliche Kulturhauptstadt vun Sleswig-Holsteen. Dor mag en beten wat Wohres an ween.

En Spektakel jaagt dat anner:

De "Akschoon Ferienspaaß" in’n Sommer/Herbst,


de "TanzZeit" mit Live-Musik ünner frien Heven,



siet 1993 de "Plattdüütschen Kulturdaag" all twee Johr in’n Septembermaand,




 

de veer "Langen Nächte" an de veer Wekenennen in’n Novembermaand,

un "Les Art" tosamen mi de Stadtbökerie eenmol in de Maand.

Ok en wichtige Rull in’t Kulturleven vun Eckernföör speelt dat Huus – de Jugend-, Kultur- un Medienwarksteed. Hier drippt sik Jung un Oolt: In’t Kommunale Kino, bi’t Kinnertheoter un bi Lüttkunstveranstalten.

Över dat Museum is al dat en un annere segt worrn. Allens, wat en över Geschichte un bedüden Persönlichkeiten vun Eckernföör weten will un kann, gifft dat hier to sehn. Museumspädagogische Föhren un Utstellen köönt de Wetenslöcker sluten.

Allens, wat Se aktuell opto noch weten wüllt, köönt Se ünner www.ostseebad-eckernfoerde.de/veranstaltungskalender afropen.

Hier noch de Henwies op 4 Grootveranstalten:

* Sprottendaag in`n Maimaand

* Aalregatta in`n Junimaand

* Piratenspektakel in`n Augustmaand

* Wiehnachtsmarkt in‘ n Dezembermaand

Blangen disse Kulturanbotten vun de Stadt gifft dat en Barg Veranstalten vun enkelte Künstlers un Verene. De ehr Adressen findt Se över en Link. Dit hier is man blots en lütte Utwahl vun de kulturellen Inrichten un Veranstalten in Eckernföör.