auf Hochdeutsch

De Geschicht vun Eckernföör

Wannehr de Stadt Eckernföör grünnt worrn is, is nich bekannt. Den Namen findt wi eersmols in de Johren 1197, 1222 un 1288 överlevert, un twors in Tosamenhang mit de Naams "Godescalcus de Ekernvorde" un "Nikolaus de Ekerenvorde". Hier, mang dat smalle Gatt vun Noor un apen Bucht, verleep an’t End vun’t 12. Johrhunnert de Hannelsweg vun Noorden na Süden. De däänsche König (uns Land weer domolige Tiet Deel vun’t däänsche Königriek) wull dissen Padd vör Rovers schütten un leet dorüm en Borg buen. De warrt 1231 in den Liker Census Danial vim Waldemar II. as "Ykernaeburgh" nöömt.

15. – 18. Johrhunnert

In’t 15. un 16. Johrhunnert verlagert sik de Hannel jümmer mehr in de oost-westli Richt, hen na Rendsborg an de Eider. De grote weertschopli Opswung in disse Tiet kummt ok Eckernföör as Havenstadt mit besünnere Rechten, wat den Twischenhannel angeiht, goot topass. De Seehannel nimmt to, un dormit ok de Bu vun Scheep. Opto bestimmt bit in’t 17. Johrhunnert rin ok Fischfang un dat Brueriewesen dat weertschopli Leven in Eckernföör, dat sien eerst Blöhtiet in’t 18. Johrhunnert beleevt. Eckernförer Kooplüüd sünd nu ok as Reeders in’e Gangen. Hier mutt to allereerst de Familie Otte nöömt warrn. In’t Johr 1758 warrt in uns Havenstadt 36 Koopfohrerscheep tellt, alleen söventeihn (17) dorvun höört de Ottes to. Disse Familien grünnt blangen Tegelien un en Wullfabrik Fayence-Manufakturfabriken in Criseby un Eckernföör (bit 1780).Wat hier herstellt worrn is, warrt wiet över de Grenzen henweg nafraagt, ok vundag noch.

De Graaf vun Saint Germain

En geheemnisvulle, düüstere un radelhafte Person in de Eckernförer Geschicht is de Graaf vun St. Germain. De hett siet 1780, tohoop mit den däänschen Stadtholler, Landgraaf Carl vun Hessen, in den Alchimistentorn vun Louisenlund Experimente dörchföhrt. Dor hett he Metall herstellt, de dat Gold liek sehg un ok Farven tosamenröögt, de aver nich duerhaft to bruken weern. För disse Produkschoon hett de Landgraaf de Otteschen Fabriken opköfft un den Graafen to Verfögen stellt. Överlevert is ok en Rezept för en Gesundheitstee. Veel is bit op den hütigen Dag över dissen Graafen spikeleert worrn, de an den 27. Februar 1784 in Eckernföör storven un in de Sankt-Nicolai-Kark to Graff bröcht worrn is.

19. – 20. Johrhunnert

Eckernföör is dat öllst Seebad in de Noordmark, 1831 in Borby grünnt. Vun disse Tiet an geiht dat, Padd vör Padd, vöran mit den Frömmenverkehr (Tourismus), de vundag dat weertschopli Standbeen vun Eckernföör is. Um da Johr 1900 herüm bestimmt aver noch Fischfang un de fischverarbeiten Industrie dit Bild, denn bito en Drüddel vun de Inwahners (6000) leevt vun de Fischerie. Eckernföör is aver ok Garnisonstandoort. Siet 1912 gifft dat hier Militär, denn för de kaiserliche Torpedowarksteed is en Scheetstand söcht un neeg bi funnen worrn: in Eckernföör. Af 1936 is de Marine in Carlshöhe tohuus. Bit an’t Kriegsend arbeit in de Torpedoversöökanstalt um un bi 7000 Minschen. Mehr över de Stadtgeschicht findt Se op de Internetsieden vun't Museum Eckernföör un in den historischen Stadtföhrer vun K. Fr. Schinkel "Ein Spaziergang durch die Stadtgeschichte". Opto gifft dat in den Bookhannel dat "Eckernförder Lexikon", tosamenstellt vun de "Heimatgemeinschaft Eckernförde e. V."in Tosamenarbeit mit de Christian-Albrechts- Universität to Kiel. Hier findt en de wichtigsten Stichwöör över dat Oostseebad.