auf Hochdeutsch

Marinestandoort Eckernföör

Eckernföör is siet Johr un Dag Garnisonsstandoort. En Drüddel vun de Inwahners höört to de so nöömt Bunnesfamilien. De Wehrtechnische Deenststell 71 (WTD) hett de Opgaav, ünner Water de verschedenen Techniken vun Wapen to ünnersöken. De Bunneswehr, de totiets paddwies üm- un afbuut warrt (Bunneswehrstrukturreform), is jümmer noch de gröttst Arbeitgever in Eckernföör. Warrt dat woll ok blieven, ofschoonst 44 Prozent vun de militärischen un zivilen Deenstpossens streken warrt. Disse Verlust drippt de Weertschop ganz gehörig. De sleswig-holsteensch Lannesregeren hett dorüm beslaten, de Gemenen, de dörch dissen Schaden sünners stark bedrapen sünd, mit finanzielle Sprütten ünner de Arms to griepen (Konversion). De Stadt Eckernföör hölpt dorbi mit. So warrt Bedrieven dat orrig wat lichter un eenfacher maakt, sik hier antosiedeln oder aver sik to vergröttern. Sünners lückt is de Versöök in Noorden (Carlshöhe) mit Anbinnen an de B 76, militärische Anlagen dörch en privoten Anlegger to nütten. Dat schull, ok annerwegens, School maken.

In 't Johr 2011 hett dat Ministerium för Verteidigung fastleggt, dat dat keen Wehrplicht mehr geven schull, dorför en Friewilligenarmee. Dor weer ok de Marinestandoort vun bedrapen. Nu, na den Besöök vun Ministerin v. der Leyen, ist kloor:

De Marinestüttpunkt Eckernföör is vun grote strategische Bedüden un schall bit in't Johr 2020 saneert un uutbuut warrn. De Tall vun de Deenstpossens vun totiets 3000 warrt in de tokamen Johren op 3400 anwassen. Dat warrt denn en grote Hölp för de Weertschop un de städtischen Finanzen warrn.