auf Hochdeutsch

Jörg Sibbel, Börgermeister vun Eckernföör

To de Person

Börgermeister Jörg Sibbel is an den drütten Märzmaand 1965 in Hanerau-Hademarschen (Homaschen) born worrn un in Löwenstedt (Kreis Rendsborg-Eckernföör) opwussen. He is verheiraadt un sien Fru un he hebbt beid twee Söhns. Na dat Abitur an’t Werner-Heisenberg-Gymnasium in Heid (Heide) fung he en Lehr bi de Kreisverwalten Rendsborg-Eckernföör an. En verwaltenswetenschopli Studium an de Verwaltenshoochschool in Altenholz (Olenholt) sloot sik an mit den Afsluss: Diplom-Verwaltensweert (FH). Sien eerst Steed dorna weer in’t Ornens- un in’t Sozialamt vun de Lanneshauptstadt Kiel, al 1993 wurr em dat Leit vun’t Ornens- un Sozialamt in Nortorf (Norddörp) anvertrut. De Karriere güng stüttig bargop. De neegsten Statschonen: 2002-2006 de eerst hauptamtliche Börgermeister vun de Gemeen Osterrönfeld mit söss Gemenen un 8000 Inwahners. Gliektiedig harr he ok dat Leit as Verwaltensbeamter. Dat Kladdern op de Karriereledder weer nich optoholen. Gröttere Opgaven hebbt em kettelt, un so leet he sik an den 24. Septembermaand 2006 in en Direktwohl to’n hauptamtlichen Börgermeister vun Eckernföör wählen, an den 25. Maimaand 2014 noch mol för 8 wiedere Johren. Jörg Sibbel höört keen Partei to. Frietiet mit Familie un Sport holt em fit.

Opgaven vun den Börgermeister

De Börgermeister, so will dat Gesett dat, is de Vertreder vun de Stadt. He hett twors dat Leit vun de Verwalten, man he mutt sik bi sien Doon un Hanneln an dat holen, wat em de Raatsversammeln as Teels (Ziele) un Grundsätz vörgifft. Tosamenfaat: He is dor verantwoortlich för, dat in de lopen Verwalten allens sien Ornen hett. De Börgermeister is opto de böverste Deenstherr in sien Amtsrebeet för all de Mitarbeiters/schen. As Baas vun de Stadtverwalten mutt he dorvör sorgen, dat de Sitten vun de Raatsversammeln un Utschüsse goot vörbereidt warrt. Wat denn beslaten warrt, dat mutt he utföhrn, kann aver, wenn he meent, dat gegen gelln Recht verstött warrt, Inspruch inleggen.